PHENG YEAT: កម្មករកាត់ដេររោងចក្រ SL ប៉ះទង្គិចជាមួយសមត្ថកិច្ចប៉ូលិស នៅស្ពានស្ទឹងមានជ័យ

ភ្នំពេញ: ក្រុមកម្មកររោងចក្រកាត់ដេរ SL រាប់រយនាក់ ដែលបានដើរហែក្បួន ទៅសុំអន្តរាគមន៍ពីសម្តេចហ៊ុនសែន នៅផ្ទះរបស់លោក នៅវិមានឯករាជ្យ នាព្រឹកថ្ងៃទី១២វិច្ឆិកានេះ បានប៉ះទង្គិចជាមួយនឹងក្រុមសមត្ថកិច្ចប៉ូលិស នៅចំណុចស្ពានស្ទឹងមានជ័យ។
ការប៉ះទង្គិចនោះ មានការគប់ដុំថ្មដាក់គ្នា ហើយក្រុមកម្មករ បានវាយឡានប៉ូលិសផងដែរ។ ឡានប៉ូលិស ១ គ្រឿង និងម៉ូតូ ២គ្រឿង ត្រូវបានគេដុតឆេះ នៅមុខវត្តស្ទឹងមានជ័យ។
ប្រធានសហជីពខាឌូ បាននិយាយថាៈ " ក្រុមកម្មកររោងចក្រ SL ប្រមាណជា ៤.០០០នាក់ មានគំរោងហែក្បួនបាតុកម្ម ឆ្ពោះទៅកាន់ផ្ទះសម្តេចនាយករដ្ឋមន្ត្រី ហ៊ុន សែន និងដាក់ពាក្យបណ្តឹងទៅកាន់ស្ថាប័នពាក់ព័ន្ធផ្សេងៗទៀត ដើម្បីជួយអន្តរាគមន៍ដល់ពួកគេ "។
ប្រធានសហជីពខាឌូ បានបញ្ជាក់ថាៈ "ប៉ុន្តែនៅពេលដែលពួកគេ បានធ្វើដំណើរមកដល់ស្ពានស្ទឹងមានជ័យត្រើយខាងលិច ក៏ត្រូវរាំងខ្ទប់ ដោយសមត្ថកិច្ចកងរាជអាវុធហត្ថ ហើយកម្លាំងសមត្ថកិច្ច នៅពេលនេះ មានចំនួនប្រហែលជា ៣០០ នាក់ ប្រដាប់ដោយខែល ដំបងឆក់គ្រប់ដៃ និងមានរថយន្តអគ្គិភ័យចំនួន ៤ គ្រឿង ដាក់នៅខាងលិចស្ពាន ទល់នឹងខ្សែត្រៀមជួរមុខរបស់កម្មករតែម្តង "។
ខណៈពេលមានការ រាំងស្ទាក់ពីកងកម្លាំងមានសមត្ថកិច្ចនោះ ទើបបានបណ្តាលឲ្យមានការប៉ះទង្គិចគ្នា រវាងបាតុករ និងសមត្ថកិច្ច។ ក្រុមបាតុករ បាននាំគ្នារត់ប្រសេចប្រសាច ដើម្បីគេចចេញពីការបង្ក្រាបរបស់សមត្ថកិច្ច។ ក្រោយមក ក្រុមបាតុករ ក៏បានប្រមូលផ្តុំគ្នា ហើយបានយកដុំថ្ម ដេញគប់ទៅលើកងកម្លាំងសមត្ថកិច្ចវិញ ធ្វើឲ្យកម្លាំងសមត្ថកិច្ច រត់ទៅប្រមូលផ្តុំគ្នា នៅលើស្ពានស្ទឹងមានជ័យ។ រថយន្តពន្លត់អគ្គិភ័យ ក៏បានដកថយទៅ នៅលើស្ពានស្ទឹងមានជ័យ។
ក្រុមបាតុករ បានឡោមព័ទ្ធកម្លាំងសមត្ថកិច្ច ហើយសមត្ថកិច្ចបានដេញបាតុករវិញ ធ្វើឲ្យកម្មករដកថយ ដោយមួយចំនួនដកថយទៅ ប៉ែកខាងលិចកន្លែងដើម និងមួយចំនួនទៀត រត់ចូលវត្តស្ទឹងមានជ័យ។
ស្ថិតក្នុងស្ថានភាព ប្រទាញប្រទង់គ្នានោះ ក្រុមបាតុករ បានដណ្តើមយករថយន្តប៉ូលិស (រថយន្តមួយតោនកន្លះ ដែល មានកៅអីទល់ខ្នងគ្នា) ហើយបានយករថយន្តនោះ ទៅដុតកំទេចចោល នៅត្រង់ទីកន្លែងដែលក្រុមបាតុករលើកមុន បានដុតឡានប៉េអឹមចោល ក្នុងកំឡុងពេលបោះឆ្នោតជ្រើសតាំងតំណាងរាស្ត្រ អាណត្តិទី៥ នារសៀលថ្ងៃទី២៨ ខែកក្កដា ឆ្នាំ២០១៣ កន្លងមក។
ជាមួយនឹង អគ្គិភ័យដ៏សន្ធោរសន្ធៅ បណ្តាលមកពីការឆេះរថយន្តនោះ ក្រុមបាតុករ ក៏បានវាយប្រហារដោយដុំថ្ម ដណ្តើមបានម៉ូតូរបស់សមត្ថកិច្ច ពីរគ្រឿងបន្ថែមទៀត យកមកដុតកំទេចចោលជាមួយរថយន្តនេះផងដែរ។
នៅក្នុងការប៉ះទង្គិចគ្នា រវាងកងកម្លាំងសមត្ថកិច្ច និងក្រុមបាតុករនោះ សមត្ថកិច្ចបានចាប់ឃាត់ខ្លួនបាតុករម្នាក់។ ប្រមាណជា ១០នាទី ក្រោយមក ក្រុមបាតុករ បានដេញប្រឆាំងតបតនឹងការបង្ក្រាបរបស់សមត្ថកិច្ច ហើយបានធ្វើឲ្យកម្លាំងប៉ូលិស ៥នាក់ រត់គេច ហើយទៅចូលពួន នៅក្នុងកុដិលោក ក្នុងវត្តស្ទឹងមានជ័យ។ ក្រុមបាតុករ បានកំពុងតែឡោមព័ទ្ធកុដិលោកមួយនោះ ដោយមានបាតុករខ្លះ ព្យាយាមទម្លាយទ្វារ និងមួយចំនួន ព្យាយាមទម្លាយបង្អួច ក្នុងគោលបំណងចូលចាប់ប៉ូលិសទាំង ៥នាក់នោះ យកមកធ្វើជាចំណាប់ខ្មាំង ដើម្បីជាថ្នូរ ក្នុងការទាមទារ ឲ្យមានការដោះលែង បាតុករម្នាក់នោះ ដែលសមត្ថកិច្ចចាប់ខ្លួនបាន នៅពេលមុននេះ។
ភ្លាមៗនោះដែរ កងកម្លាំងសមត្ថកិច្ច បានបាញ់គ្រាប់ផ្សែង និងបានបណ្តេញក្រុមបាតុករ ពីក្នុងវត្តស្ទឹងមានជ័យ និងនៅខាងមុខវត្ត ឲ្យពួកគេដកថយទៅដល់ផ្សារស្ទឹងមានជ័យ ហើយសមត្ថកិច្ច បានគ្រប់គ្រងទាំងស្រុងនូវតំបន់ ដែលបង្កឲ្យមានអំពើហិង្សាកើតឡើងនោះ។ ក្នុងពេលនោះដែរ កម្លាំងប៉ូលិសចំនួន ៥នាក់ ដែលបានគេចខ្លួនពីក្រុមបាតុករ ទៅពួនក្នុងកុដិលោកនោះ ក៏បានត្រូវរំដោះឲ្យចេញមកវិញដោយសុវត្ថិភាពផងដែរ។
មិនទាន់មានរបាយការណ៍ពីការរងរបួស ក្នុងអំពើហិង្សា ខណៈដែលសមត្ថកិច្ចប៉ូលិស បានព្យាយាម រាំងផ្លូវ មិនឲ្យក្រុមកម្មករ ហែក្បួនចូលភ្នំពេញ ដើម្បីឆ្ពោះទៅផ្ទះសម្តេច ហ៊ុន សែន នៅព្រឹកថ្ងៃទី១២វិច្ឆិកានេះ នៅឡើយទេ។
ជាការកត់សម្គាល់ ជម្លោះនៅរោងចក្រកាត់ដេរ SL នៅភូមិឫស្សី ក្នុងសង្កាត់ស្ទឹងមានជ័យ បានកើតឡើងជាង ៣ ខែមកហើយ។ ក្រុមកម្មករ ទាមទារឲ្យមានការដកប្រធានរដ្ឋបាលរោងចក្រ រួមទាំងលក្ខខណ្ឌជាច្រើនទៀត៕