ក្រុមហ៊ុន បម្រើសេវាទូរស័ព្ទ Smart Axiataនឹងចាប់ផ្ដើមដំណើរការកម្មវិធីប្រូមូសិនដូចជា ការបន្ថែមទឹកប្រាក់ ៥០០ ភាគរយ ការបន្ថែមចំនួននាទី និងសេវាផ្សេងៗទៀត ពីថ្ងៃទី២៤ ខែធ្នូ នេះតទៅហើយ។
លោក យុសុះ សារី មន្ត្រីទំនាក់ទំនងជាមួយរដ្ឋាភិបាលរបស់ក្រុមហ៊ុន smart បានថ្លែងប្រាប់
គេហទំព័រថ្មីៗថា ដោយតាមយោងលិខិតប្រកាសរបស់ទីស្ដីការគណៈរដ្ឋមន្ត្រី កាលពីថ្ងៃទី២០ ខែធ្នូ ស្ដីពីនិរាករណ៍ប្រកាសអន្តរក្រសួង ២៣២ នោះ គឺក្រុមហ៊ុននឹងអាចមានសិទ្ធិផ្លាស់ប្ដូរគម្រោងវិញបានហើយ។
លោកបន្តថា៖«ក្រុមហ៊ុនយើង នឹងចាប់ផ្ដើមដំណើរការនូវកម្មវីធីប្រូមូសិន ៥០០ % ចាប់ពីថ្ងៃនេះទៅហើយ។ ដូច្នេះអតិថិជនរបស់ smart ទាំងអស់ សូមរង់ចាំមើលការផ្ញើសារបញ្ជាក់ពីក្រុមហ៊ុន នោះអតិថិជននឹងអាចប្រើប្រាស់កម្មវិធីនេះឡើងវិញបានហើយ» ។
មន្ត្រីរូបនេះក៏បានធ្វើការបញ្ជាក់ផងដែរថា សម្រាប់កម្មវីធីប្រូមូសិនផ្សេងៗទៀត ក្រុមហ៊ុននឹងជូនដំណឹងនៅពេលក្រោយ តាមរយៈសារបញ្ជាក់ពីក្រុមហ៊ុន។
សម្រាប់បញ្ហាដែលអ្នកប្រើប្រាស់ភាគច្រើនយល់ច្រឡំថា ក្រុមហ៊ុនម៉ូប៊ីថែល ទិញក្រុមហ៊ុនស្មាត តាមរយៈ លេខកូដសួរទឹកប្រាក់នោះ លោក សារី ក៏បានបញ្ជាក់ផងដែរថា តាមពិតទៅលេខកូដនេះគឺមានតាំងពីយូរណាស់មកហើយ គ្រាន់តែអ្នកប្រើប្រាស់គាត់មិនបានចាប់អារម្មណ៍តែប៉ុណ្ណោះ។ កាលពីពេលថ្មីៗ អ្នកប្រើប្រាស់ប្រព័ន្ធស្មាតមានការភ្ញាក់ផ្អើល ដោយសារតែពួកគេចុចលេខកូដ សួរទឹកប្រាក់ #124# ដែលជាលេខកូដសួរទឹកប្រាក់របស់ក្រុមហ៊ុនម៉ូប៊ីថែល តែក៏អាចសួរពីចំនួនទឹកប្រាក់របស់ប្រព័ន្ធស្មាត បានដែរនោះ។
សូមបញ្ជាក់ថា កាលពីថ្ងៃទី២០ ខែធ្នូ រាជរដ្ឋាភិបាលកម្ពុជាតាមរយៈ ទីស្ដីការគណៈរដ្ឋមន្ត្រី បានចេញនូវសេចក្ដីប្រកាសមួយ ដោយបានសំរេចយល់ព្រមតាមសំណើរបស់ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយចាត់ទុកជានិរាករណ៍នូវប្រកាសអន្តរក្រសួង ២៣២ កាលពីចុងថ្ងៃទី៧ ខែធ្នូ ឆ្នាំ ២០០៩ ស្ដីពីការកំណត់តម្លៃអប្បបរមា សេវាទូរស័ព្ទនោះ៕
ប្រភព
No comments:
Post a Comment